日產響去年底前，以連番宣傳攻勢，去催谷部全新Cefiro車系，總算有回報，錄得有唔錯銷售紀錄，亞Mark聽聞嚟緊3月上旬，代理有計劃乘勝追擊，再推出Cefiro頂級嘅3.5公升V6型號；既然講得上係TopModel，自然響配套同設備上，都要較原有2.3V6型號來得優勝啦！除有齊17吋大口徑合金胎軨組合外，重有Xenon大燈、窗簾式安全氣袋及VDC系統㖭！
唔單止咁呀，部頂級Cefiro嘅引擎除與350Z跑車所採用嘅一台3.5公升偈相同外，輸出亦達231匹，較同級嘅豐田Camry同本田Accord，均來得有優勢，若然屆時新車嘅定價可於35萬以內的話，相信會吸引到不少有要求，同樣着重性能及舒適性嘅用家㗎！係Cefiro嘅忠實Fans，又或者係對同級車中，為人推崇的日產VQV6引擎感興趣的話，就要留意新車嘅推出日期喇！