當奴曾去北京朝聖之後返港，講嘢當堂似足個中官。佢重複中方立場，話治港者要「愛國愛港」。
究竟乜嘢叫愛國愛港呢？當奴學足共幹嘅一句恐嚇性標準台詞：「你哋自己心知」。「你自己心知」，共黨幾十年來實行鎮壓式統治，都係靠呢句食胡。佢拉你去審，你問佢：「我犯咗乜嘢罪？」佢就會冷笑一聲：「犯咗乜嘢罪，你自己心知。」你若果再追問：「我真係唔知喎，你可唔可以講清楚？」佢就藐藐嘴，點着口煙，再向天噴口煙出嚟，彈吓啲煙灰，笑笑口話：「你心知肚明嘅。你真係知嘅。你冇理由唔知嘅。」
當奴去完北京返來，佢話此行目的已達，佢學識講呢句「你哋自己心知」，唔好睇小呢句共式對白嘅智慧，當奴面試合格，夠資格加入共產黨。洗腦成功，玩殘有效，當奴冚牌，係北京嘅目的已達就真。
不過，當奴始終都係政務官出身，跟咗英國佬咁多年，學識英國佬講嘢，暗中有條骨。佢喺立法會解畫，話所謂「愛國愛港」，即是唔做損害中國嘅事，亦唔做損害香港嘅事，咁就係「愛國愛港」嘞。
嘩，用呢一句，測試番阿廢董，咪好大鑊？廢董上台以來，成功將香港由一個殖民地時代繁榮嘅國際金融都會，狂插成為一個靠中國輸血吊命嘅失業城、燒炭港、衰退大都會。連行政會議成員兼民建聯老愛國曾鈺成都識得講：民建聯跟阿董搵食，「只有辱，沒有榮」。損害香港利益，阿董認第二，邊個敢認第一？
至於損害國家利益，阿董就更加唔使講，除咗要國家「屍爬」輸血，喺十三億人民乞衣缽拿飯食，分薄晒國家利益，國家嘅胡溫，啱啱登場，至話化咗個靚妝，口口聲聲講「以民為本」，「情為民所繫，利為民所謀」，成功呃到國際社會落叠，令布殊等人以為「胡溫新政」，中國真係會有啲同國際接軌嘅誠意。點知，阿董係都要迫到香港五十萬人大遊行，再焗到胡錦濤露出反民主真面目，搞到英美表態，推動支持香港民主，國際對胡溫另有睇法，覺得佢哋同大隻江、李鵬係一路貨，以後我哋胡溫出國訪問，點樣再吟詩，點樣再流淚？點樣再去哈佛演講，點樣再亂拋盧梭、華盛頓同埋馬丁路德金？「胡溫新政」終於向港人指令：唔理你基本法噏乜，總之，治港要以愛國者為主體。
係咩？死鬼鄧小平當年，好似唔係咁講。
一九八四年十月三日，老鄧接見「港澳同胞國慶觀禮團」，佢話：「由香港人推選出來管理香港的人，由中央政府委任，而不是由北京派出。選擇這種人，左翼當然要有，盡量少些，也要有點右的人，最好多選些中間的人。這樣，各方面人的心情會舒暢一些。」
老鄧話：治港者，係以「中間派」為主體，親中「愛國」嘅左翼（即是土共左仔、維園阿伯），老鄧反而下令，「盡量少些」，至於土共眼中嘅右派，即大律師湯家驊、梁家傑、李柱銘、甚至劉慧卿，老鄧話，「也要有點右的人」，即是話，梁家傑、李柱銘、劉慧卿入埋行政會議，都冇問題，只要「多選些中間的人」，例如謝偉俊、白韻琴、張燊悅、沈殿霞、董驃呀咁，平衡吓左右兩方，咁香港就會繁榮。
「胡溫新政」想閹割鄧小平理論，土共想曲解鄧小平治港指示精神，「護法」想指鹿為馬？重有好多白紙黑字嘅文件紀錄。冇咁易。香港重有好多人未失憶，記得六四，記得民建聯亦嗌過「打倒鄧李楊法西斯」，當然亦記得，鄧小平話，治港者要以中間派，唔係甚麼「愛國者」為主體。
傳真︰2623-9278
電郵︰