前晚睇英超直播李斯特城鬥保頓，雖然戲碼一般，但睇保頓嘅「騎呢」死球戰術，都夠開眼界嘞。
話說每當保頓得到禁區外死球，就搵兩個球員企正對方龍門口越位位置；開出死球後，越位球員就即刻走返入人叢中，趁混戰「博大霧」。
可能球證及旁證都未見過呢吓奇招，一直都無吹罰佢哋越位喎！如果喺往後日子保頓真係靠呢一着入波，真係隨時有其他球隊照辦煮碗，咁艾拿迪斯都可謂闖先河嘞！
最慘係李斯特城門將獲加，俾呢一招搞到無法集中，都唔知應付邊個好，卒之真係「領嘢」，慌失失下擺個「老烏」囉！
曾經有人話布魯克林會步佢老竇碧咸嘅後塵成為職業足球員，嚟睇會喺不久嘅將來成事。喺五月就滿五歲嘅布魯克林，𠵱家喺熱刺接受足球訓練。聽講話碧咸嘅屋企人都住喺倫敦，於是為咗方便佢就揀咗熱刺，不過計我求大俠話，碧咸咁做九成係佢重嬲曼聯當日將佢賣畀皇馬。
咪以為淨係英格蘭足總盃同埋德國盃先係爆冷嘅溫床，法國盃亦一樣爆到七彩。衞冕冠軍嘅歐塞爾前晚喺十六強賽事以強陣出擊，陣中包括施斯同保桑等法國國腳，點知就俾支丁組球隊布里夫搞掂，輸○比一。好彩馬會冇開呢場比賽，如果唔係，肯定一地都係眼鏡碎。
《福布斯》啱啱喺周二公布咗「中國名人榜」，火箭中鋒姚明獨佔鰲頭，上年嘅收入高達一億二千萬人民幣。但佢嘅經理人立即出嚟話《福布斯》報大數，姚明嘅收入根本冇咁多。原來《福布斯》嘅富豪榜曾經多次成為當局追稅嘅目標，難怪姚明嘅經理人打死都唔認喇！
俾曼聯借去安特衞普嘅董方卓，日前喺預備組正選登場，重憑一次「完美助攻」，幫球隊贏布魯日預備組一比○。雖然佢重未有機會喺比甲聯上陣，但所謂「好嘅開始係成功嘅一半」，我求大俠相信佢只要繼續努力，有朝一日可以好似李鐵同孫繼海呢兩位前輩咁，喺英超聯比賽。