無綫為了開源節流，近日採取裁員行動，效力無綫逾十年的梁思浩日前接到通知，不獲續約。他昨日召開記者會，表示自己曾為無綫在節目中扮豬扮狗，但最終公司還是放棄他，梁思浩直指炒他的人無情無義。
無綫為了開源節流，近日進行架構重整，除裁減部份員工外，對不少藝員亦實施「一年一騷」制。甘草演員如羅蘭、胡楓，以及余文詩和朱健鈞等均未能幸免。無綫上星期起已陸續向員工派大信封，就連在資訊文教科服務三十二年、曾演《林亞珍》一劇的楊又祥亦被辭退。
雖然大部份藝員均在不情願的情況下接受「一年一騷」，但服務無綫十多年的梁思浩竟連「一年一騷」的合約也無份，令他大感不是味兒。
梁思浩昨日於九龍灣召開記者會，他表示為無綫效力多年，即使貼錢做騷亦沒有所謂，更自覺與無綫談心多於講金，無奈最後卻換來大信封。梁思浩說：「我上個星期睇報紙先知俾TVB解僱咗，我當時覺得好愕然，我今日只係想將事實講出嚟。其實兩年前我已經同TVB簽一年一個騷，我都唔緊要，佢當時話同公司共度時艱，又冇醫療、冇強積金、冇保險，我都唔介意，講真要搵錢都唔會喺TVB喇！我好開心喺TVB工作，我愛TVB嘅程度可以放低錢嚟講，最慘係扮豬扮狗佢哋都唔要我。」
梁思浩從報道中得知被解僱一事，更親自致電無綫藝員分部助理總監樂易玲，他說：「佢都話我冇做錯嘢，更加唔係公司嘅負擔，佢話兩個月之前已經通知咗我寄咗信畀我，點解我會𠵱家先知？可能我之前搬咗屋冇通知TVB，我都係之前返舊屋先收到封信。講真我年初一重喺團拜扮壽星公，上星期重幫無綫拍嘢，原來我嗰時已經係吊緊頸嘅壽星公。佢重同我講話我喺戲劇組，查番我紀錄，至知好多年冇拍劇。
「我覺得樂小姐你點做電視㗎？我十五年前先喺戲劇組嘅，佢又話公司喺揀人嘅時候，覺得我出面有人要，唔擔心冇嘢做。我做liveshow都超過一萬小時，但係佢睇電視都唔知夠唔夠一萬小時。」
自言購入了十萬元以上電視廣播（無綫）股票的思浩，直指無綫今次做法令股民十分失望。對於有報道指無綫此行動乃邵逸夫的太太方逸華幕後主導，思浩說：「未經證實嘅嘢我唔方便去講，我只係就我嘅個案去講，唔可以代表其他人。講真我做一個大騷都唔夠三千蚊，絕對唔係TVB支出嘅壓力，即使扮豬扮狗我幾時sayno？我一直都冇怨言，唔通要我攞睡袋瞓喺TVB門口，有嘢做就叫我入去呀？咁我又唔會。我只係覺炒人嗰個好無情無義，如果兩年前早知簽一年一騷嘅後果係咁，我會覺得好後悔。」
此外，昨日有報道指無綫將會裁員四百人，無綫總經理何定鈞昨晚在將軍澳電視廣播城否認有關報道，他說：「邊度裁四百人咁多，可以裁到四百人嘅話，第一個係裁我自己，𠵱家只係喺節流方面着手，目前唔知裁員數目。」何定鈞更強調裁員並非方逸華的決定，是整個管理階層開會後的決定。
對於梁思浩被裁而開記招，指高層樂易玲居然不知他屬綜藝科，何定鈞表示梁思浩被裁是製作部意思，他說：「唔知個原因係點，係製作部嘅取捨，我同佢距離重遠，更加唔知。」至於今晚TVB職員協會與立法會議員李卓人商討未來對策，他說：「唔會阻止，亦都干涉唔到，亦唔清楚人事部會唔會派人出席。」
採訪：王崇穎、卓美娟
攝影：林德雄
