咸豐年前嘅Windows3.1時代，已瘋魔不少機迷嘅《PowerDolls》系列，一直都不停咁推出新版，到踏入2004年，正值10周年紀念嘅最新PC版《PowerDolls6》亦宣布登場。
記者：徐影龍
呢隻以模擬戰鬥為主嘅Game，一直活躍於PC界，而且頗受歡迎，不過唔知點解，喺家用機上始終無聲無氣。新一集仍是以PC上嘅Windows為作業平台，最大好處梗係超高解像度喇，而且戰鬥畫面由舊有嘅俯瞰式改為第一身視點，新鮮感滿分，廠方號稱為今集特別加入3DCG技術，令機體表現靈活得嚟亦好靚，不過部PC就需對應DirectX9先玩到，即係老爺機免問。
玩法方面極為注重戰略運用，新加嘅小隊系統，需玩家自行組成小隊出戰，而且需配合唔同環境編成，如戰鬥攻擊型、強行型、偵察型等小隊，以發揮最大效果。極受歡迎嘅兵器系統依然健在，今集亦加入大量新型武器，供機體自由搭載，相信能吸引一班SLG迷。由於《PowerDolls6》首先推出日文版，香港機迷若不能順利安裝，可嘗試將WindowsXP嘅系統內碼轉為日文，就可睇到兼玩到㗎喇。
相關網址：
