因為春宮帶事件而上位嘅ParisHilton，同歌手「來佬荔枝」LionelRichie愛女NicoleRichie演出嘅真人騷《SimpleLife》，喺美國收視相當不俗，剛推出嘅DVD又賣得，電視台重即時宣布要添食！呢個真人騷之所以咁好睇，係因為可以見到兩個有錢女好多自以為好yeah、但其實好鬼幼稚嘅行為，笑到觀眾肚痛。
《SimpleLife》內容講述Paris同Nicole兩個老友，俾電視台收起所有信用卡同手機，要去農場工作一個月，聽落條橋有啲似N年前嘅日本節目《電波少年》。Paris同Nicole無論喺鏡頭前後，滿腦子都只有名牌、粗口同性愛，要佢哋去農場打工，真係同落地獄一樣咁辛苦！呢兩位靚女冇份工可以做多過一日，好似去養牛場工作，佢哋經常俾啲牛糞彈上身，自然頂唔順，又因為要伸手入牛肛門驗孕搞到慘叫。
歎慣嘅Paris同Nicole講真都幾冇品，佢哋開工倒牛奶嘅時候，為咗貪快竟然成桶水倒入牛奶樽度，做到攰嗰陣，佢哋又喺老闆個後花園曬太陽，呢種打工皇帝真係冇人頂得順！