一講基本法，港澳辦就推番嗰幾位老人家出前台，話當年立法「原意」係點係點，令人擔心，二十年後，呢班老人瓜晒之後，搵邊個嚟解釋「原意」呢？今時今日，前草委死嘅死、病嘅病、退嘅退，所餘冇幾。
廖暉八六年做草委時，只有四十三歲，做緊僑辦主任，喺中方成員中最後生，目前重喺前台；許崇德同蕭蔚雲嗰時唔算老，一個五十六，一個六十一，許乃人民大學法律系副教授，蕭則為北大法律系副主任。
八六年邵天任已經七十一，係人大外事委員會顧問，佢當年重好精靈，講嘢條理分明，馬丁都話厲害，不過𠵱家佢老人家隻耳聽得唔多清楚，要人在旁嗌。
四大護法之一嘅吳建璠以前係社科院副所長，今年都七十八，身體欠佳，冇見煲呔。
當年嘅錢昌照同張友漁，兩個都係八十六，姬鵬飛七十五，今日，三個已經喺晒下低。想問當年立法「原意」？請問米婆，成本一年高過一年。
至於港方草委，二十三名港方草委中副主任級嘅安子介、包玉剛同費彝民都已去世，剩番個李國寶副主任。
委員當中廖瑤珠英年早逝，其餘嘅有啲已經好低調，好似馬臨、黃麗松、李福善、鄭正訓、容永道、釋覺光、鄺廣傑、查濟民同查良鏞，唔多想講嘢。重活躍嘅有李柱銘、司徒華、劉皇發、譚耀宗、鄔維庸、黃保欣、李嘉誠、霍英東同譚惠珠，所以，好快就到二○四六年嘞。
傳真︰2623-9278
電郵︰