李燦森、吳彥祖同王合喜都係玩得之人，佢哋三個日前應MTV台嘅遊戲節目《WhateverThings》邀請，坐喺一隻鐵鑊中玩刺激玩意，呢個節目專玩啲無聊嘢，擺明係抄美國大受歡迎嘅節目《Jackass》。
李燦森好大膽，佢坐喺鐵鑊度，然後俾電單車拖住行，都咪話唔刺激，而一向鍾意滑水同玩滑板嘅李燦森，佢話呢個玩意都係濕濕碎，玩完之後佢重喺鏡頭前笑個不停。而李燦森之後又同運動健將王合喜、吳彥祖輪住坐喺鐵鑊裏邊，然後滑落樓梯，佢哋嘅平衡力好好，所以滑落時都好順暢。
MTV台巿場推廣及傳訊部經理莫可欣日前話：「大家睇呢個節目係幾得意，不過有一樣要提嘅係睇電視嘅觀眾，尤其係小朋友，千祈咪模仿，因為唔做足安全措施係好危險嘅。」
最新一期台灣《壹週刊》話林熙蕾今年年初靜靜雞去咗美國相睇，男方身高有成六呎，後生又有米，林熙蕾噚日就以「神經病，無聊」嚟形容呢個報道，佢話去美國主要係陪吓爸爸，根本就冇去相睇，又埋怨話明明喺屋企乜都冇做，都有啲咁嘅新聞，覺得好無奈喎。
環球歌手張敬軒前晚都有去會展捧美國騷靈歌后DionneWarwick場，估唔到佢年紀輕輕，竟儲齊晒歌后所有嘅碟，佢重話特別欣賞黑人歌手嘅磁性歌聲。張敬軒近期為咗出新碟，不停咁喺北京、美國、上海同香港多地飛嚟飛去錄音，佢話咁樣係想新碟質素好。
黃澤鋒喺佐敦經營嘅火鍋餐廳喺年三十晚之後就暫停營業，原來黃澤鋒計劃喺灣仔一個更大嘅地方擴展業務。黃澤鋒噚日喺電話度話：「新舖下月中開業，預計都要花成幾百萬，新店走高檔路綫，我嘅拍檔重啱啱去完歐洲考察㖭。」
周渝民（仔仔）日前接受車淑梅主持嘅港台節目訪問，大講情史。曾經拍過五次拖嘅仔仔，被問到點樣追求初戀情人時，仔仔話：「先是寫好一封情書，自己寫的更有意義。」談及理想情人，佢就話：「要心地好，最重要是有默契，其他都不重要了。」
