當奴代表香港人上京四十八小時，俾中方玩殘。搵咗個叫做李飛嘅人大「法工委」人員，叫得做李飛，即是話對住阿當奴「小李飛刀」，但佢把飛刀就故意虛發，佢話「按照中方工作習慣思維，乜嘢都要研究」，二○○七年可否普選特首，呢個李阿飛就唔肯講。
呢頭小李虛招出完，就輪到新華社代表中國政府，兜頭打出一記「黑虎偷心」。新華社話：「中央」嘅立場，一國兩制，「一國」係兩制嘅前提，治港嘅港人，要以所謂「愛國者」為主體，而香港嘅「高度自治」，只不過係由「中央授權」嘅一個直轄嘅地方。咁即是話，胡錦濤（冇錯，經外交部駐港特派員高調解畫，「中央」就係阿胡）經已親手宣判香港二○○七年普選特首及二○○八年立法會直選死刑。蕭蔚雲只不過係小丑角色，邵天任就係打觔斗，李飛負責唔聲唔聲搬道具，最後行正台前紮馬揮拳嘅，唔係江澤民，唔係曾慶紅，原來係先幾日至喺巴黎大讚孟德斯鳩、盧梭等法國民主先驅、聲稱執政「以民為本」，同宣布中國要實行政治體制改革嘅胡錦濤嘞。
一國係兩制嘅前提？冇錯。但《中英聯合聲明》同《基本法》都講到明，「一國」只負責香港另一制嘅國防同外交。除此之外，一切事務，就係港人高度自治範圍。𠵱家港人冇話要主動參加解放軍，滲透中國嘅國防權力，當奴曾嚟北京，亦唔係見工想申請做中國外交部雜務助理。「一國」就係喺國防外交兩方面體現主權，呢一樣，由一九八二年起，中國政府不斷向包括英國在內嘅國際社會多方保證，現在公開反口食言。
治港者要「以愛國者為主體」。何謂「愛國」？乜嘢叫主體、客體，或者雌雄同體？五月初五端午節，堅持食糭，算唔算愛國？鄧小平一度被毛主席列為修正主義頭子，佢想將偉大嘅祖國紅色江山改變顏色，係咪叛國罪犯？經美國總統克林頓及本港立法會議員何俊仁先後揭發：仔女同樣入晒美國籍，曾擔任有收集情報任務嘅「美國國際策略研究中心」及「紐約外交關係委員會國際顧問局委員」嘅董建華，係咪百分之百愛國？「愛國」嘅解釋權，係由胡錦濤一人壟斷、由「護法」蕭蔚雲、邵天任、許崇德等老人獨家承包，定係由一度係祖國人民公敵嘅鄧小平，透過問米婆開口重新澄清？
甚至江澤民對住香港女記者用英文鬧，胡錦濤本人去到法國，竟然大讚人哋法國鬼佬嘅資產階級自由化思想家，一字不提統一祖國有功嘅秦始皇，又係咪都幾崇洋媚外，唔係咁愛國？若然連管治中國嘅領導人，都唔係咁以愛國者為主體，香港嘅陳方安生，拒絕接受肥彭及英國頒畀佢嘅女爵士勳銜，不知幾咁愛國，點解又遭到徐澤當面大罵羞辱？請當奴曾挺直腰板，昂高頭，代表香港人，一一問清楚答案！
傳真︰2623-9278
電郵︰