平治C-Class自新一代型號於2000年5月推出以來，一直成為車迷追捧對象；但響最近，廠方就決定為其推出Facelifted新版，不但外觀及車廂布局變得更富跑味之餘，就連性能及操控表現，都要較原有型號來得更出色、更吸引呢！
驟眼望去，雖然Facelifted新版C-Class嘅車身線條與原有型號相近；但當細心留意吓，不難察覺如上圖嘅四門版新車，頭泵把、鬼面罩及胎軨皆屬全新款式，看來獨特又吸引之餘，就連一組頭燈（可配用照射範圍更廣嘅CorneringLight技術）亦改用上更明亮嘅設計，照明度明顯較前提升；然而，頂級Avantgarde型號更備有車身兩側裙腳配搭，跑意盎然之感盡在不言中。
無論係四門版、旅行車，又或者係SportsCoupe，其車廂鋪排都略有改動，當中表板及中控台嘅鋪排屬新配搭，喺帶有同廠E-Class車系嘅影子之餘，更備有一套Thermatic恒溫冷氣系統，匹配前後兩排承托力甚豐嘅座椅，乘坐可謂舒適又愜意。
廠方特別為Facelifted新版C-Class嘅四門及旅行車版，加入一台原先只出現於C230KompressorSportsCoupe型號嘅一台1.8公升Kompressor引擎，不但馬力輸出高達192匹外，兼且重有運轉寧靜及低耗油量嘅特性；當然唔少得重有走高性能路線、並擁有高達367匹馬力嘅C55AMG型號啦！
底盤配搭亦經過全面強化，廠方除為新車換裝上一套跑車懸掛組合外，同時亦改用上較闊嘅205/55R16輪胎組合，喺多套電子系統輔助下，行車循迹性之高絕能予人十足信心呢！
