律師A臨時放低香港公事，飛咗去美國，左丁山重以為佢有單大刁要過去處理。佢嘅同事總監B話：「非也，實情係為咗佢嘅女嘅學校要見家長，講申請入大學之事。」仔女讀書大過天，喺香港讀名校，幾時都係阿媽一齊做功課，大賓卡亦要落水。去到美國讀名校，父母更加緊張啦，學校叫到，當然趕急登機，公事交低畀下屬?同事，冇話唔得啫。
十年前，財務總監M喺洛杉磯打電話過嚟搵我，講咗兩句客套話就交咗畀佢位千金，唉吔，原來千里之外，打電話問功課，請左丁山惡補中國最新情況，幫佢做一個「中國經濟」嘅project，十五年前一個暑假，主席R直情叫佢位千金上到左丁山辦公室，同佢一齊做會計學一○一功課，眨吓眼R千金已從英國畢業返嚟好耐，成為大行分析師，呢三幾年唔見咗佢，大概結婚去也。父親為咗仔女讀書，無微不至，利用外交關係，叻過啲阿媽。
美國著名中學，非常重視學生申請入大學嘅過程，有一套行之已久嘅有效方法，教學生點樣申請入讀長春藤名校，不過召見家長，就比較少見，律師A自己讀書之時，成績叻到冇得頂，睇怕佢咁錫個女，第日都會幫佢花時間做吓功課。其實財務總監M、主席R、律師A、左丁山等等讀書之時，邊度可以問父母，邊度可以問父母嘅朋友呀，係靠自己搏殺啫，如此瞓身幫下一代讀書，會唔會係栽培溫室花草呀！