好多時手機出廠都未必係十全十美，話冇Bugs就真係搵鬼信，睇吓邊個唔好彩同埋最少Bugs咁解嘅啫，所以一啲好心嘅廠商都會有UpdateFirmware嘅服務，本來都係一件美事嚟，不過羅新基睇完個Friend部機之後，都心大心細拎唔拎去Update好。話說有日索記有人打電話畀佢，叫佢拎部T610上台UpdateFirmware，咁佢當然義不容辭第一時間拎上去，不過部機返嚟之後，用咗一日就成個畫面「反肚」，最後重無疾而終，入廠換過部新機，咁樣「Update」法都唔知係好事定壞事。
3G登陸香港都已經成3個禮拜，之但係喺「3」出機麻煩多多，又要等貨、又唔可以淨出SIM卡、買機又一定要上台，有生意做重口水多多，認真麻鬼煩。不過早兩日羅新基行街就見到有手機舖放咗部NECC6163G機出嚟賣，開價都要$4,380，雖然個價錢同你喺「3」出機一樣，不過可以即刻有機，又唔使焗你上埋台出SIM卡，都未嘗唔係件好事。又或者如果咁啱有3G用家跌爛部機，橫掂拎番上去都畀人「劏」到一頸血，不如快快手手買過部用重開心！
數記部SharpGX22重賣到如火如荼，傳聞下一部新機GX30已經殺到埋嚟，唔使講外形及其他功能，淨係個100萬像素影相鏡頭已經有排講，羅新基估計呢一兩個月就會有嘢睇。不過日前同手機舖老闆吹水，佢就話早兩日有人拎部GX30落嚟舖頭放機，一開口就索價$6,500，重要係Vodafone版本（即係德國水貨，只得英文顯示）。老闆聽到呢個價當然耍晒手擰晒頭，咁又係，雖然話個市好番啲，不過大嗱嗱6千幾蚊收部機，重要冇中文，到時坐艇咪大件事！
文：羅新基