港股兩日升546點後，噚日終於要唞一唞，輕微調整61點，收報13515。國企亦下挫，其中以中石化（386）全日遭空襲，挫5.93%至3.175元。收市後，英國石油BP透過大摩，以每股3.10至3.15元將所持有的中石化清倉。BP早前已將中石油（857）售清，今次沽埋中石化並非奇事。
黑客話今次認購反應唔錯，芬佬獲分派比率最高只有20-30%，中石化估計唔易破底。不過，BP是石油化工業老行尊，中石油及中石化抵唔抵買，佢一定好清楚；當然，BP本身等錢使亦係事實。
大摩幫BP沽中石化同時亦唱淡地產股，理由是地產股整體價格已高出資產淨值3%，加上樓價難以大幅上升，故叫客戶減持。但Cookie話，樓價會否大升好難講，但今次升市唔似過往幾次小陽春，反彈力度頗強，同時可持續一段較長時間，地產股股價高於資產淨值，基本上是反映市場以真金白銀睇好樓市前景，唔係得個講字。
新地（016）買入紅灣半島50%後，港府公布該項目與發展商達成補地價協議，業界估計新地可淨賺約8億元，但新地股價仍跌0.64%，而孫公則被指賤賣土地明益地產商，事件發展到呢個地步，歸根結柢都係阿董「八萬五」惹的禍，大家何必搵孫公出氣。
確利達（1224）噚日有9000萬股大手成交上板，每股作價0.17元。市傳是大股東渝港（613）減持，不過股價未受傳聞拖累，反升4.3%，收報0.194元。渝港1月中已以每股0.17元沽出2億股，持股量降至64.79%。
阿虎