大市有啲回吐，恒指調整61點，國企指數跌147點，跌幅近3%，大過恒指跌幅，結果龍虎榜上，有3隻中企指數Put輪入圍，有1隻而且排第二，就係9369。
9369收8.6仙，升幅16%，隻輪6月底到期，溢價22.2%，槓桿率20.9倍。望國企指數5個月內散16%，唔多實際。當然如果揸隻輪撞啱國企指數忽然散幾個巴仙，自然有肉食。另1件同類Put輪9423，升12.4%，亦係6月底到期，輪價12.7仙，溢價16.3%，槓桿率14.1倍。呢件溢價相對低啲，不過都仍然係買唔落手，除非覺得國企股會再調整多一陣。同樣上榜嘅同類輪9424，升10.9%，收16.3仙。呢件嘅數據，比前面兩件更加不如，值博率更低。
個市反反覆覆，唔易掉頭大散，國企股亦係，不妨吼機會低買中企指數Call輪，近期嗰批，數據實際得多。9317、9366、9363等3件，值得諗吓。7月打後到期嗰批，交投普遍多啲，不過溢價普遍高好多，其實唔值得咁高，因住就算國企指數向上郁少少，佢哋嘅價錢都只會只見身郁唔見米熟。
東亞（023）盤數靚，中銀（2388）盤數睇嚟都會唔錯，收15元，升兩格。穩陣投機揸中銀Call輪，揀9115，雖然有正股派息因素，同埋槓桿率麻麻，但負溢價抵番晒。
章盛