一早爆響口希望入股內地銀行嘅東亞，過去兩年大大話話都傾過五十間銀行，奈何均未能成事，東亞主席李國寶同八方講起此事時，引述一名內地高官，話佢揀結婚對象（指入股夥伴）「咁奄尖，邊有咁靚嘅女仔」；對方更勸佢，話國內標準同國際唔同，「要成親就要跟國產標準」。
寶Baby最鍾意跟某家大銀行抬摃，噚日傾起東亞有冇人工加時，佢就話識得「有個好叻嘅銀行家」，佢個chairman講明今年冇人工加，呢位賓架同寶Baby講，若果東亞加到百分之五或以上，恐怕都會畀到壓力佢哋主席喎。
講到政制討論，曾任基本法起草委員會副主任嘅寶Baby話，已睇過晒《基本法》，又寫低晒特區政府嗰十二條，更drop低埋自己諗法，寄咗畀教過佢法律嘅兩名憲法權威專家，𠵱家要等高人回覆後，佢先至會答記者呢個問題。至於係咪九月選立會，佢就話仍未決定，但有好多賓架叫佢去馬。
（圖）寶Baby俾內地高官話佢揀「對象」（即入股夥伴）好奄尖。
傳真︰2623-9278
電郵︰