抽水配股一浪接一浪，中石化（386）英國策略性股東，噚日配售18億股中石化，大拿拿套現成57億銀咁多，但小初一啲都唔擔心會影響大市氣氛，皆因小初四圍問過，發覺冇人有貨，加上批股價折讓咁細芬佬都咁踴躍，即係睇好後市咁解啦。
因為大市氣氛好，所以連帶創業板股份都有芬佬吼，好似近排股價屢創新高的安德利果汁（8259），近排就好勤力，頻頻會見證券界，市場傳佢想抽水。
安德利噚日升6.25%，收0.85元，成交股數1713萬股，金額1448萬元。
無論安德利係唔係想抽水，隻股向來都有芬佬照顧，起碼有3個大基金坐咗大批貨，如果佢哋唔沽嘅話，街外貨源咁乾，股價要再升其實唔難。
另外，一向股價企得好硬嘅福方國際（885），噚日一度大插水，最低見過1.70元，收2.10元，仍跌12.5%。經紀陳話，據講福方貨源分布，幕後有關人等一向知得清清楚楚，今次咁搞法，睇嚟會有一場爭拗。
慕容小初