世界盃外圍賽亞洲區下個禮拜展開，日本首階段分組對手雖然唔強，但就非常重視；下個禮拜中主場對阿曼，就特登搵專機載「國寶」中田英壽歸隊。
博洛尼亞今個星期聯賽要到星期日主場對摩德納，所以中田英壽最快都要翌日先至起程飛返去日本，但係對阿曼場比賽禮拜三就打，日本足總決定搵架價值四百六十萬美金嘅私人飛機載佢返國；而飛機型號（PiaggioAvantiP180）就同「車神」舒密加早兩個月前參加一場方程式賽車鬥戰機，所坐嗰架到比賽場地嘅一樣，認真大陣仗。
其實，日本足總之前亦出成百萬美金，包伊拉克足球隊全體人員到日本踢練習賽，作為阿曼假想敵，我求大俠都不得不佩服佢哋備戰工作咁認真同咁大手筆！
今季新秀狀元、十九歲嘅勒邦占士喺噚日贏塞軍嗰場波攞咗廿四分，立即成為NBA史上最年輕達一千分里程碑嘅球員；咁蹺係「探花」嘅安東尼都唔示弱，喺同日贏灰熊場波都過一千分，不過因為佢比占士大七個月，喺排名榜只排第三。呢兩位名氣最盛新人果然不負眾望喎！
前日朝場葡超波博維斯塔迎戰艾華卡成齣上盤客奇遇記咁。話說艾華卡先入波，主隊去到補時四分鐘至追番粒，以為始終都要開下盤，點知原來補時到七分鐘，主隊再入多粒贏埋二比一，開埋上盤，重唔止咁，喺九十八分鐘艾華卡更有球員被逐……嘩！球證隻表係咪有事呀。
另一宗令我求大俠𢱑頭嘅消息，係英超修咸頓會長盧維話已原諒咗前領隊荷杜當年不辭而別，重準備立即叫佢返嚟領軍，頂史特根個位。修咸頓球迷對呢個消息唔係好受落，不過，修咸頓前鋒比亞堤肯定舉腳贊成，因為佢喺荷杜麾下打起，但𠵱家淪為後備，當然想荷杜打救啦！
最近有宗轉會消息令我求大俠𢱑晒頭，就係土耳其靚仔前鋒伊利安由比錫達斯轉會日本職業聯賽會神戶勝利船，簽約至○六年一月三十一日。伊利安只係二十八歲，重好當打，亦有唔少歐洲大球會對佢有興趣，唔通真係因為佢喺日本好受歡迎，令佢覺得寧願賺日圓好過？