林瑞麟喺北京俾中方護法老人公然羞辱，話以前未見過佢，即是話D9唔夠秤，重暗示話佢以前同肥彭效力，呢筆舊帳祖國唔會失憶，有官場中人為林D9不值，話佢後生啫，唔係罪嚟㗎，大陸鍾意搞老人政治，班護法個個都八、九十歲，D9未夠五十，梗係監生遭到矮化喇。
有親中人士的確幾仇恨吓D9，話佢斗膽唔先問准中央，自己扑槌經研究後07年要普選特首係得嘅；有人話D9根本唔識字，人哋明明寫住07年以後，當然唔包07，叫佢快啲公開向四大護法下跪認錯。
D9上星期喺辯論施政報告時，臨尾提今年立會選舉選民登記五月十六日截止，叫大家如果想喺九月投票又未登記嘅話，就要記住5.16之前去登記。5.16係老毛當年發動文革一個好重要嘅日子，莫非林兄乃民主派卧底，八月十五殺韃子，想發動港人奪權炮打司令部，暗語就係516？
傳真︰2623-9278
電郵︰