外號「荷李活四方果」嘅英國女星美妮哉花（MinnieDriver），呢幾年人氣持續低迷。好似早排樂施會邀請美妮到東南亞探訪一班被剝削嘅女工，佢就即時𦧲飯應，愛心爆棚嘅美妮，為慈善出少少力之餘，亦成功博到曝光。
雖然美妮呢兩年喺荷李活交白卷，不過佢喺英國拍廣告同做舞台劇，總算生活無憂。美妮為咗改善泰國同柬埔寨女工嘅生活，由上個禮拜開始就喺柬埔寨一間小型製衣工廠做車衣女工，體驗當地貧苦婦女嘅工作。為咗更了解當地婦女嘅生活，美妮重入住當地嘅員工宿舍，咬住牙齦一日做足十幾個鐘，對美妮嚟講，分分鐘慘過做奴隸。
不過咁，歎慣食慣嘅美妮，亦冇投訴過一句，佢除咗努力學習車衫外，重以樂施會大使嘅身份，了解女工嘅需求。經過一個星期嘅體驗，美妮話會改變shopping習慣，以後都會杯葛刻薄員工嘅英美大型連鎖店，我羅拉都覺得佢有骨氣。好似佢前日臨走嗰陣，不停喺fashionshow上重複呢番話，重俾柬埔寨外長讚佢係一個有使命感嘅靚女。