德國奧迪車廠近年狀態大勇，不斷為旗下車系推出新一代版本，繼推出新一代A4及A8後，最近外國方面就有消息傳出，指廠方正為旗下走中型豪華轎車路線嘅新一代A6型號，作最後研製工作，並預期可望於下月初舉行嘅瑞士日內瓦車展上，與全球車迷見面。
從相片中可以睇到，快將推出嘅新一代A6車系，其造型略帶有同廠旗艦級車系A8嘅影子，尤其係車首一對扁長嘅頭燈，襯以大幅面鬼面罩配搭，就最能將呢個特點顯現出來；而同屬新設計嘅尾燈鋪排，亦予人清晰易讀之感呢！
引擎配搭方面，有關消息指新車將會有多個配搭供選擇，當中包括有入門版嘅2.0公升直4偈，同埋頂級型號所配用嘅4.2公升V8型號；與此同時，廠方亦會為車子加入Quattro恒式四驅系統，以滿足不同用家需要。至於車廂布局，由於暫時未有呢方面嘅詳細資料，故有待廠方公布關於新車嘅進一步資料後，方可作實。