大市調整，國企亦然。恒指收13515，跌61點；國企指數收4845，跌147點，主要係幾隻重磅股跌幅都幾大，特別係中石化（386），低收3.175元，跌5.9%，收市後果然有「披成」消息，英國石油悉售所持的18.29億股中石化H股（佔10.9%），作價3.1元至3.15元，折讓唔大，其實已跌定等宣布。
國指升到5000水平，調整一下好正常，中石化今次披成，聽聞散戶冇份，全部畀基金接晒，對國企市勢唔會有太大影響。國指調整完，又會再上過，再創近期新高機會極大。
ValuePartners增持華豐紡織（364），持股量又升番上5.15%，自華豐宣布03年度（9月年結）業績，同未來兩年展望樂觀後，基金同大行亦紛紛提高華豐的評價，目標價更調升到1.59元。聽聞世銀屬下的IFC同美國一個「大芬」對華豐好有興趣，且已安排短期內坐埋傾一傾，唔排除會有合作同入股嘅可能性。傾完之後，華豐又會出外地做騷，未來一個月，華豐股價應該會有好強勢表現。
華豐主要經營漂染業務，最新的發展係在瀋陽成立合營，提供布料加工服務，憑藉瀋陽合夥人的客戶網絡，進一步打開華北市場。03年度，華豐獲利9066萬元，升16.17%，每股盈利13.63仙。現年度多了兩項盈利新來源，分別係開展非純棉梭織布染整業務（初步年產量2900萬磅），以及今年1月投產的紡紗廠（初步年產量1300萬磅），加上澳門新稅例提供的優惠，令稅率由17%降至不足1%，04年度盈利預計可大升至1.43億元，05年度再升至1.7億元，每股盈利分別為18.5仙及22仙，以大行目標價1.59元計，05年預測PE亦僅7.2倍，仍遠低於同業平均的11倍PE。華豐已突破長達7個月的下降軌阻力，且有大成交配合，中期升浪再起，量度升幅1.62元。
遠東發展（035）亦已升破上升三角形阻力，衝上2元水平，創出升浪新高，聽聞管理層在歐洲做騷，反應好好，唔排除有新基金入市，走勢破位後已望空衝刺，初步目標係2.45元。
郭兆誠