上個禮拜日本落實港人免簽證去旅行後，「袁人祥」自稱大大話話有十幾個記者打電話畀佢想訪問，問嘅問題離不開「日本免簽證對水貨行業有乜影響？」咁嘅芝麻綠豆小事都要問祥哥，可見祥哥嘅「水貨大亨」地位有幾咁崇高！祥哥聽後，突然變得謙虛：「講有錢，講地位，其實我點及旺角波鞋街班大佬？最近嗰度有個好出名嘅拆家，花名『高佬』，佢掃貨都非常大手筆，每批波鞋數都以過十萬元計，而且每次都畀現金找數；聽講佢身上隨時有十幾萬現金傍身。」咁「高佬」買十幾萬波鞋攞去邊度散呢？斷估唔會扔上網逐對慢慢賣畀散客啩？祥哥吸啖水貨煙，呼呼噴出煙圈，解釋道：「『高佬』會將成批鞋拆成幾份，立即拆畀台灣、新加坡同其他地方嘅『艇仔』，每對賺幾十，每手貨都可賺到一兩萬，一個月做番一兩劑，好過打工喇！『高佬』眼明手快，賺少啲冇所謂，但求次次清晒批貨，絕唔會壓貨。正所謂行行出狀元，『高佬』算係新一代典範。」
主持人：大食Jack
八卦熱報：