新車速報：<br>豐田AlphardG享受至頂級

新車速報：
豐田AlphardG享受至頂級

豐田代理引入全新Alphard豪華MPV，繼早前一部富動感嘅V版之外，要數到至豪華出眾，相信非呢部AlphardG型號莫屬；佢唔單止有齊豪華舒適嘅座艙設計，另外重有一套高級AV系統連屏幕組合，置身其中嘅享受，較一般四門轎車有過之而無不及。

記者、攝影：陳偉林

豐田Alphard自推出以來，一直備受用家賞識，不僅予人至全面舒適嘅乘坐感，加上廠方不斷精益求精，推陳出新嘅配套設備，令呢部Alphard豪華MPV，給用家有至貼身嘅享受㗎！

■一體式泵把連氣霸組合，望落份外吸引突出。

■一組大幅面尾燈配搭，簡潔清晰又易讀。

■高置尾翼連煞車燈組合，既美觀又見多一份安全性。

賣相吸引有貴氣感
而呢部屬頂級豪華嘅AlphardG版本，造型來得豪邁有貴氣，既有齊至高亮度頭燈配搭，又有四輪時款合金胎軨同尾定翼組合；而前後一體式泵把連氣霸設計，重附有前後泊車感應裝置，還備有車尾魚眼鏡配搭，單係一身造型經已係既吸引又有瞄頭呢！

■車頂雙天窗組合，可給予乘客更多親近大自然嘅機會。

■前排乘客席前方嘅雙層首飾箱容量甚高，擺放雜物變得更方便。

■車廂四周鑲有瑰麗桃木作修飾，盡顯豪邁氣派一面。

豪華裝備享受高
車廂三排七座位配搭，中排亦屬獨立組合，兩旁除備有雙電趟門外，中排之間更備有活動桌几，而且還有獨立腳踏㗎！
中、後排多變化嘅組合，既可騰出更多載物空間外，標準裝備還包括原廠前後恒溫冷氣，又有高級AV系統連10吋LCD顯示屏幕，加上劇院式燈光裝置，以及原廠車門窗簾，置身其中可謂享受至愜意又滿足呢！

■雙電趟門方便乘客上落外，中排更備有獨立腳踏配置。

■後排空間寬敞闊落，乘坐妥貼又舒適。

■車內三排座椅，全以高級真皮鑲嵌而成，其中前排更備有獨立手枕組合。

操控了得又出眾
原車以一台3.0公升V6偈，匹配4前速自動波，起跑加速有力又見行車暢順；其次，新車同樣備有四輪電子懸掛設計，可因應不同路面環境外，重附有主動式VSC同TRC系統，加埋四輪碟煞、ABS、BA連EBD裝置，制動重見得收放自如㗎！

■中排中央設有桃木餐桌及杯座，實用度高。

■鑲有桃木裝飾嘅一體式中控台上，有齊原廠恒溫冷氣及高級音響組合。

■雙天窗中央設有LCD顯示屏，配合高級AV系統，可為沉悶旅程帶來不少娛樂。

■表板左旁備有電子避震、TRC系統及電趟門等設備嘅控制鍵。

■車子備有AutoLight裝置，可提高晚間行車安全性。

■一套4前速自動波轉檔順滑，並能讓引擎發揮至極。

記者評語：乘坐舒適度十足
至頂級G版有齊雙電趟門配搭，三排座椅坐得舒適又闊落，兼且重有賞心悅目嘅高級AV系統連屏幕，加上一套電子避震所帶出嘅穩妥操控感，無論駕駛者又或者係乘客，同樣會感受到一份愜意。

豐田AlphardG3.0V6規格
引擎：2995ccV6DOHC
馬力：220ps/5800rpm
扭力：31.0kgm/4400rpm
傳動：4前速自動波，前輪驅動
懸掛：（前）麥花臣支柱（後）扭力連桿
制動：（前）透氣碟（後）碟式（ABS）
輪胎：205/65R16
尺碼：4800×1805×1935mm
軸距：2900mm；車重：1865-1925kg
新車售價：$449,000
車輛提供：皇冠汽車（28661020）

■新車沿用一台3.0公升V6偈作核心，好力之餘又見運轉寧靜順暢。