莫文蔚（Karen）噚日去尖沙嘴出席佢阿哥莫理斯創作嘅《寶貝寶環遊世界歷險記》兒童英語VCD活動，Karen嘅父母都有出現撐場，而最難得就係連Karen嘅前緋聞男友周星馳，喺百忙之中都不忘送上花牌支持，不過Karen就唔認星爺係支持自己，Karen話：「多謝佢，我諗佢係支持呢個活動，我就唔知佢同阿哥熟唔熟，可能佢哋會有啲合作啩。」馮仁昭就覺得星爺十分長情，但Karen就冇正面回應，只係話：「呢個圈好多人都會互相support大家，佢嘅戲我都有客串啦。」
至於Karen嘅哥哥莫理斯就表示認識星爺但唔太熟，因為佢係Karen嘅朋友，所以都見過幾次面，但莫理斯就話同Karen嘅現任男友馮德倫熟啲，重大讚馮德倫係好人㖭。
此外，Karen對於日前《千機變II》拍攝期間內地記者被電影工作人員推落水一事，Karen就話：「我冇睇報道，但係我喺國內做大型活動時，都會有公安喺度，所以秩序冇問題，而且我之前喺國內拍戲都會匿埋嚟拍，好少會公開畀記者知。」
EO2噚日喺港台接受訪問，早前有傳陳見飛同Eddie已秘密分手，而Eddie更自爆情人節想約圈外女性去街，不過就唔會送禮物畀佢。成員Otto即取笑佢話：「你梗係想齋搞唔咀。」個女仔知道俾人咁講重會唔會應約呢？
台灣歌手蔡依林近日為新唱片進行錄音，不過因為蔡依林早前去咗紐約跟茱莉亞羅拔絲嘅老師學習「聲音表情」課程，今次即時用呢種技巧灌錄唱片，所以工作人員都好緊張，幾乎每首歌都要求佢重唱，令佢大受壓力，重影響到佢懷疑自己患咗抑鬱症，好彩最後錄完音嘅效果好好，佢先放心。
張國榮嘅家姐張綠萍噚日去到港台出席一個頒獎禮，當記者問到哥哥嘅好友唐鶴德係唔係就快離開香港，佢就話唔清楚呢件事，不過以佢所知唐唐好鍾意香港，而且有好多朋友喺度。另一方面問到哥哥嘅骨灰𠵱家放喺邊嘅時候，張綠萍就話，就算知都唔會講畀大家知喎。其實大家都係想有機會拜祭吓哥哥啫！
E-Kids成員Tommy有份開設嘅運動服裝店「三人主意」，俾一本周刊話佢賣假NBA波衫，服裝店噚日入稟高等法院告呢篇報道誹謗，而且令到生意大跌，所以就申請禁制令同索償。Tommy噚日喺電話中話：「佢哋搞到E-kids失咗個運動衫廣告，我搵埋公證行驗貨，證明全部係真嘢。我要求對方賠償我使咗嘅十幾萬律師費。」
案件編號：HCA228/2004
羅文前助手Terry噚日喺港台，同記者講番泰國助手Wit被迫遷一事，佢話好開心睇到報道影出嚟曼谷間屋都保持得好好，但係所有嘢嘅決定權都係交畀遺產承繼人，即係籮記兩位姐姐去負責。Terry亦都話自己唔記得阿東同張徹太太有冇去到泰國搵Wit，總之呢啲咁私人嘅嘢就唔會回應。
