喺夏天時兩大西班牙轉會焦點人物「細哨」朗拿甸奴同埋碧咸，一直以嚟都以加盟皇馬嘅碧咸好似受歡迎啲同埋表現好啲，不過，加盟巴塞隆拿嘅細哨終於喺星期日嘅聯賽一吐烏氣，對住奧沙辛拿時射入咗精采絕倫嘅世界波（無論黐個波落嚟，抑或係挑過對方後衞同埋射門嗰吓都值一百分），重幫巴塞贏二比一兼升上第四位，有機會爭下屆歐冠盃參賽席位。
話時話，細哨唔單止幫巴塞全取三分，重幫埋《蘋果波經》嘅名家華度中波膽三串七，七十蚊本就有成一萬銀番嚟，果然可以刀仔鋸大樹。不過，華度就話佢重要多謝巴塞另外一名球員，佢就係中場沙維喇。如果唔係沙維喺臨完場前近門「打飛機」，場波都唔會二比一完場。
德甲班霸拜仁慕尼黑終於喺○四年開齋，喺星期日以三比一擊敗漢諾威。不過拜仁龍門簡尼喺比賽期間嫌隊友薛羅拔圖防守做得唔好而叉佢頸。點解簡尼咁㷫？原來賽前佢俾漢諾威前鋒比達錫揶揄，後者作咗首歌話簡尼唔掂，重出埋CD。俾人咁唱法，簡尼唔嬲就假。
車路士領隊雲尼亞里唔係被傳會俾班主阿巴莫域治炒魷，就係俾球隊行政總監簡安話冇料，好似好慘咁。其實佢把口都好厲害。喺星期日車仔贏咗查爾頓一比○後，佢就話肯定自己帶領球隊贏波場數，比阿巴莫域治同埋簡安帶領多，又話國米夠簽咗幾廿人，又唔見佢哋奪標！
尼日利亞喺星期日嘅非洲國家盃擊敗喀麥隆入四強，我求大俠都替佢哋高興。不過，有一個人就唔多開心，之唔係英超球隊保頓嘅領隊艾拿迪斯囉。𠵱家尼日利亞入咗準決賽，即係話中場大腦奧高查可能要遲多成個拜禮先歸隊，對球隊部署踢二月尾嘅聯賽盃決賽始終有影響。
伯明翰門將M泰萊日前對曼城一役，救出兩、三個必入波，但領隊布魯士賽後竟同記者講，球隊表現幾差，重講佢老竇畀錢睇電視收費直播呢場波完全唔值。我求大俠都有睇場波，覺得又唔似佢咁講咁唔值，淨係M泰萊救施比斯基個頭槌經已值回票價，布魯士唔使咁謙虛喎！