樓價急升，令到業主心雄，反價之聲不絕，估唔到連銀主盤都係咁。
屯門慧豐園一個銀主盤，銀行反價幾次，先至肯賣，而且價錢重高過市價㖭，都算係罕見。
祥益地產營業經理潘玉恒話，呢個銀主盤係三座高層A室，八八九方呎，放售咗三四個月，原本叫價逾百四萬，到農曆年前加到百五萬，其後再反價至百六萬，最後以一百六十五萬售出，比市價高一成至一成半。
佢話，銀主幾度反價，情況少見，估計可能係近排市況好轉有關。
潘玉恒話，同類單位放售少，所以呢個盤一直有唔少客表達興趣，淨係佢公司都有兩三個客出價洽購，結果由住喺隔籬嘅居屋屋苑業主買咗。呢個買家打算以先買後賣，放售自住嘅居屋單位。
好多人都跌晒眼鏡，估唔到樓市下半年急速反彈。舊年年中夠膽入市，𠵱家賺到笑。
利嘉閣西貢分行高級經理黃富傑話，上個月有十幾單入貨半年轉手大賺兩成到四成幾。
黃富傑透露，部份業主甚至到價都唔賣，顯然對後市好樂觀。例如西貢一座西班牙別墅，舊年造價八百萬，原業主放盤叫價千二萬，有客肯承，足足可賺五成，但賣方即時反價到千五萬，因此暫未成到。
假如個盤賣得出，就高購入價八成八，利潤幅度可能係一個紀錄。
業主咁心雄，原因係個盤質素好，附泳池、大泊車位、同擁海景，所以唔憂賣。
物業管理公司提供嘅服務，要不斷跟隨客戶要求而改變。置邦最近就喺又一村又一居一期，引入盲人按摩服務。由深水埗區香港盲人輔導會，每個禮拜指定時間，派出「流動按摩隊」，到又一居會所，為住客按摩。
呢項服務受住客歡迎之餘，重可以為弱勢社群提供自力更生機會。
蘭西記得，住宅屋苑率先引入呢種服務，係新地旗下管理公司。
本港投資者好國際化，美聯梁志輝話，一個本地廠家，繼連購兩舖，近期開始進軍上海，用千一萬，買入浦東上海招商局大廈一個五千呎寫字樓。
佢係實業家，由於看好中港經濟，同CEPA效應，中港積極掃貨，先以三千萬買入兩個旺角舖位，年初十又喺上海買寫字樓，作收租用途。
荃灣朗逸峯二期係猴年第一個紅盤，農曆年前開賣，一踏入猴年就賣晒，好多地產代理都發到新年財。
噚日就頒發成績表，由美記勝出，做到四成，佣金連獎金過千五萬。
長實高級營業經理黃思聰話，今次採用「跳bar」制，兩家大行都去到兩個巴仙，各加萬元獎金。賣晒三百幾個單位，淨係佣金支出，已經逾三千五萬。
蘭西
電郵地址：
