首富李嘉誠紅顏知己周凱旋喺國內縱橫政商界，佢旗下嘅基金會最近就同國家教育部、中國科學技術協會合辦「明天小小科學家」活動，逾三百名來自全國嘅高中生本月初齊集北京參賽，香港代表係庇利羅士女子中學嘅中五學生梁潔欣，重攞埋全國二等獎。
梁潔欣參賽嘅報告名為「眾椒尋C千百好」，以二氯酚靛酚試驗（DCPIPTest）搵出邊一種辣椒含有最豐富維他命C，結果係指天椒。梁潔欣話之前上生物堂只係紙上談兵，今次同埋同學仔落手落腳做實驗，成四個月先搞掂個報告，「切辣椒時戴咗手套，唔知點解都辣到隻手好痛。」
梁潔欣話上到北京，先知自己個實驗小兒科，原來國內學生都有大學教授指導，一個實驗隨時做兩年先完成。
（圖）梁潔欣（中）獲獎後與評判之一中國科學院院士匡廷云（左）及贊助比賽的周凱旋（右）合照。
傳真︰2623-9278
電郵︰