好友再下1城，恒指跳高267點，升2%，國企指數重犀利，躍升227點，升幅4.8%。大市成交231億元，動力返咗嚟，升勢應未完。
國指勁升，中國人壽（2628）雖然未係國指成份股，但亦唔執輸，是日再彈4.7%，升25仙，收報5.55元。國壽去年12月尾升至7.05元見頂，輾轉回落，跌至上周四低位5.1元，好有機會成功尋底，昨日之升，已微破下降楔形阻力，應該重有得去。
國壽Call輪近個幾禮拜出咗唔少，連同昨日啱啱掛牌嘅9639，共有10件。喺正股帶動下，有兩件國壽輪打入5大升輪榜，分別係9624同9623，升幅均近32%。
國壽Call輪雖多，但唔易揀，基本上冇邊件好抵買。唔計特種輪，剩低嗰6件溢價普遍偏高，好似隻9624，現價19仙，玩到8月3日，溢價去到47.6%，即使槓桿率有29.2倍，都唔算得抵買。
最貴都係9616，玩到8月尾，現價48仙，溢價43.8%，拍住9624，但槓桿率只得11.6倍。相比之下，9623較為買得落手，現價37.5仙，8月初到期，溢價29.3%，槓桿率14.8倍，缺點係成交唔夠暢旺。
章 盛