禽流感搞到個個唔敢食雞，負責監控疫情嘅衞生福利及食物局局長楊永強就冇有怕，模仿陳馮富珍話幾大都要食雞。八方噚日喺醫管局個新春團拜撞到楊永強，問起先知原來佢重有食雞，佢重話之前重請過啲同事食雞㖭！
原籍馬來西亞嘅楊永強，雖然每日只係食生果餐，但係原來佢對食雞都好有研究，最鍾意食佢媽咪獨家炮製嘅「馬拉雞」。唔好心邪，楊公子話佢媽咪炮製嘅馬拉雞好有特色，夾雜咗馬拉同福建風味，成道fusion菜（即夾雜多國菜餚特色的綜合菜式）咁，都幾in喎。佢重話如果八方第時去大馬，就叫佢媽咪下廚炮製畀八方試吓咁話，認真客氣。雞髀打人筆頭軟，下次四面佛就好錫住我哋靚仔強嚟寫咯喎。
（圖）楊永強（右）主持醫管局新春團拜同何兆煒（左）及梁智鴻（中）齊齊切蛋糕。
傳真︰2623-9278
電郵︰