T630初推出時，以白雪公主形象現身，玩純情Feel確實吸引到唔少人，可能SonyEricsson有見及此，就幫T630搵番個「伴」，月前就在網上公布推出T630黑魂版，一於以黑白雙煞繼續殺敵。日前呢部黑魂版T630就終於有水貨到港，與「情人」白雪版T630相逢，一黑一白絕對係情侶檔用家首選。黑魂版T630外形設計同白雪版毫無分別，只不過換上磨砂黑殼、黑色水晶字粒按鈕，但係成個Feel就即時由純情Look變做霸氣Look，唔可以唔讚吓索記嘅Design功力。黑魂版開價$2,980，比白雪版水貨貴幾百蚊，雖然係水貨，不過都有繁體中文顯示。情人節就到，相信都係今期BestBuy！
記者、攝影：劉耀祥
查詢：23987320（鉑匯科技）
