本港銀行快將提供人民幣存款服務，咁啱國內又傳出人民幣會擴大波幅範圍5%，人民幣大偏低，升值5%其實一啲唔多。有外滙界好友話，現時美國外債龐大，弱美元對美國有百利而無一害，估計美元3年內都不會轉強。若人民幣擴大波幅，滙價一定升硬，若然到時一如某些「專家」所估，人民幣升值會刺激港股大升，咁港人或者掛住搵錢，唔得閒去搞政改都未定。
不過，唔使等到人民幣真正升值，國企指數已因呢個消息勁升4.7%，再挑戰5000大關。噚日陽光普照，整體港股亦靚靚，恒指升267點，收報13576，唔通投資者以為太陽照一照，所有H5N1病毒即會消失？
SUNDAY（866）早前股價時有波動，整體走勢則反覆大升。市場經常傳佢會成為電盈（008）重返本地流動電話市場嘅收購目標，但原來被國內電訊設備商華為增持先至係堅料，消息曝光後，刺激股價升4.6%，收0.68元。華為現時動向未明，但就可能成為電盈收購SUNDAY的障礙。華為乃國內最大3G電訊設備供應商之一，市場對華為入股SUNDAY的憧憬，不下於被電盈收購。
利豐雅高（623）大股東新加坡國家印刷集團以每股1.60元增持2.8%股權，較前日收市價有溢價11.9%，刺激噚日股價升近7%。阿虎初時以為大股東睇好公司前景，所以益街坊，原來只係向其他董事收購股份，小股東冇着數，亦未必代表大股東睇好公司前景，由於大股東持股逾70%，往後減持的機會高過增持，不宜亂跟。
阿 虎