由恒隆集團主席陳啟宗牽頭的「香港發展論壇」，今個星期五首次「開壇」。為了令頭炮打響，更具聲勢，陳啟宗親身賣廣告。昨日，佢主持亞洲協會午餐會完畢，循例接受傳媒提問有關樓市問題之後，就叮囑行家記住星期五要到。正當各財經記者疑惑恒隆周五有乜公布時，原來陳啟宗所指係香港發展論壇將於今個周五喺會展舉行首次論壇，頭炮係「胡應湘VS李卓人」。
陳啟宗話，「其實哥頓（胡應湘英文名）好耐都想搵李卓人對話，唔知點解，李卓人一直都好似唔係好想咁，但今次李卓人就一口答應，咁就等佢同哥頓兩個傾吓偈。我睇呢個係好事嚟，總要對話先得」。除了哥頓「舌戰」李卓人，陳啟宗重請來兩名學者，包括港大的周永新及科大的雷鼎鳴參與。
雖然陳啟宗呢頭話，第一次搞呢個論壇，未能預知人數，所以唔敢租太大的地方，但轉頭就估可能會出現「迫爆」盛況，所以要求各方嘉賓最好預先報名，到時才會安排到座位，否則隨時罰企。
（圖）陳啟宗牽頭的「香港發展論壇」，今個星期五首次「開壇」，頭炮係「胡應湘VS李卓人」。
傳真︰2623-9278
電郵︰