政務司司長曾蔭權上京，喺機場不獲中央人民政府高層接機，令人覺得，中國政府真係好小器。
當奴上嚟，已經低聲下氣，行前並無發表反共言論，佢假假哋都係代表緊香港人上嚟北京，表達港人民意，徵詢中國政府意向，北京有意待慢，咁算係點？
呢啲就叫做天朝主子心態，潛意識之中都重係覺得當奴係上門搞事。特別係派出個小官徐澤嚟招呼，更有對當奴本人嘅警告意味。當年陳方安生以政務司司長上京，見完副總理錢其琛，就被安排見港澳辦嘅主任廖暉及當司長嘅徐澤，遭到徐澤當場大罵，話佢阻撓廢董施政，陳太不堪受辱，落嚟香港之後冇耐，即刻憤而辭職。
今趟，當奴上京，連副總理吳儀、國務委員唐家璇都冇得見，除咗人大熟口熟面嘅蕭蔚雲，就係人大法工會嘅一個不見經傳嘅人員叫做李飛，以及派個徐澤出嚟，若然煲呔重好似上趟陳太嘅面口，分分鐘徐澤會再次黑起塊面，照辦煮碗。
八方想請問一聲：有權，使唔使用到咁盡？對待煲呔使唔使咁涼薄？當奴已經全無反抗能力，兼且陪笑上京，佢重出緊香港納稅人嘅糧，如果中國政府當正香港係一家人，又點會畀咁嘅面色當奴睇？
中方對二○○七普選特首嘅立場，唔係絕對冇得爭取。蕭蔚雲話：香港人有權要求○七年普選特首，亦有權要求唔喺○七年普選特首，最重要係跟隨《基本法》。呢句說話就多咗兩分人性，對於特區嗰班兇相畢露、狺狺狂吠話二○○七年普選特首即是勾結英美反中亂港嘅各色土共，無形中係細細力摑咗一巴！
自從7.1以來，土共開動宣傳喉舌，不斷誹謗湯家驊、梁家傑、余若薇，同埋要求普選嘅市民，蕭蔚雲一落嚟，亦好囂張，第二日就口風放軟，證明中國政府更高層，都有人覺得所豢養嘅呢班奴才，一開口。
駐港外交部專員楊文昌亦補充：邊個代表中央？胡錦濤就係代表中央。咁即是將阿胡擺上枱。因為阿胡訪問法國，滿口仁義道德，又孟德斯鳩，又盧梭，大讚法國民主先驅，連美國《華爾街日報》都話：回應港人○七普選民主訴求，就係胡錦濤所謂以民為本嘅「新政」試金石。
不過死嘞！港區人大代常委曾憲梓，已經代胡錦濤答咗：據佢了解，胡主席絕對不容許○七年普選。咁阿胡溫今次就被人推出前台，甚麼精衞填海，甚麼情為民所繫，利為民所謀，好快就知堅定流，全球睇到實，○七普選，就係胡錦濤一人同香港人之間要拆掂嘅一場紛爭嘞，都咪話唔好睇喎。
傳真︰2623-9278
電郵︰