第五十四屆柏林影展前日舉行到第四日，參賽電影《BeautifulCountry》嘅挪威導演漢斯彼得慕倫（HansPetterMoland）同演員白靈以及添羅夫（TimRoth）等一齊為新片宣傳，其中平時淨係識搶鏡嘅白靈，喺記者會上件衫突然鬆咗落嚟，露出胸前兩點，好自然又成為全場焦點。
華裔女星白靈喺荷李活打滾多年，浮浮沉沉，佢一直以喺各大小宴會或頒獎禮入面攝位博上鏡為己任，睇怕今次佢走光，分分鐘都係佢專登揀件唔啱身嘅衫嚟着，如果唔係點解佢露點嗰陣重鬼咁開心。而喺記者會上導演一時感觸落淚，白靈又反應好快咁一邊望住鏡頭一邊安慰導演，道行真係高。
都係唔好再講啲閒人，今屆奧斯卡影后大熱嘅查理絲泰朗（CharlizeTheron）前日都有為《Monster》出席記者會同晚上嘅放映會，佢重叫大家唔好淨係睇佢增肥三十磅同扮醜呢樣嘢，應該注重多啲佢嘅演技。
另外佢又話雖然佢扮演嘅殺人犯角色最終被判處死刑，但係佢個人係唔贊成判死刑，因為將犯人處死並唔能夠帶到正面嘅訊息出嚟。同為新片增肥嘅雲妮絲惠嘉（ReneeZellweger），前日亦有現身柏林影展，為開幕電影《亂世情天》宣傳。