不少讀者來函問點樣可以搵到阿桂姐（岑寶桂），桂姐嘅電話無謂在此公開，但根據《猴年問阿桂》呢本書嘅出版（公開性）資料，大家如果想搵佢，可以透過「玄軒居易學會」（旺角西洋菜南街二一八—二二○號生發大廈十一字樓A座，電話二三九五七三七五、傳真二三九一一○九○、電郵hk_yuantin_iching@
yahoo.com。
寫稿之前，靚女C走上嚟拜年，恭喜發財一輪之後，靚女C勸左丁山節食做運動，唔好肥到佢表姐個老公咁肥。靚女C話：「表姐夫三年前重係一百二十磅重，娶咗表姐後，體重急速上升，現在已經去到一百六十磅，有個大肚腩。唔知點解，我啲女同學嫁咗之後，佢哋嘅老公個個由瘦變肥，越嚟越肥㖭！」嘻嘻，左丁山知點解嘅，男人追女仔，娶得好老婆之後，大功告成，重邊度會花心機、時間去節食、運動keepfit吖，斷估老婆唔會因為自己變肥而要求離婚啩，如果同時荷包肥腫，老婆更加唔會嘈！
靚女C去年出嫁，預備配合人口政策，生番一兩個，確係勇氣可嘉，但佢一諗起子女他日嘅教育問題，就十分惆悵，因為佢啲已經為人母嘅同學晚晚都話陪仔女做功課，唔肯陪靚女C行街。左丁山係過來人，正想安慰佢唔使驚之際，大賓架打電話嚟：「喂，我個仔做功課交Project，有幾樣嘢唔識，我今晚要推咗應酬，返屋企教佢，你幫我搵定啲資料得唔得，你實識㗎，嗱……」左丁山為之失笑，香港啲名校要求多多，父母都疲於奔命。