經紀黃農曆年前曾叫小初買大成生化（809），近期隻股氣勢如虹，除咗飼料產品可以抗禽流感之外，芬佬的支持亦功不可沒，噚日出現兩宗大手上板，經紀黃話係有芬佬增持。
大成噚日最高見過6.10元，收6元，升9%，成交金額1.34億元，在24球成交之中，有13球係非自動對盤成交，造5.44元。
經紀黃表示，年初叫小初買入大成，皆因佢知道有間歐資行會幫手推介。事實上，呢間歐資行真係好幫得手，既出報告睇大成目標價6.80元，又幫手搵客戶買。
不過，一個月時間都未夠，大成股價已經由4元水平升至家陣6元附近，真係有多少食胡之意。
另外，上海復地（2337）首日上市表現平平，估唔到第二日先至發威，噚日大升14.85%，收2.90元。但經紀黃話，復地上市之時，係以低PE招徠，家陣去到呢個水位，PE已經同其他中資地產股差唔多，加上重有超額配售未行使，叫小初無謂高追。
慕容小初