西貢大家就去得多，西貢滘西洲西面嘅小島橋咀洲，唔知又去過未？橋咀洲有2個好響朵嘅沙灘，一個係又稱半月灣嘅廈門灣，另一個係橋咀灣，前者以水清沙幼著名，後者以連島沙堤見稱，今日就一次過遊勻橋咀洲2大靚灣喇。
記者：陳震霖
攝影：陳智良
模特兒：Jessica（Imagine）
先聽有趣故事，廈門灣點解又叫半月灣？話說N年前，有英軍踏足橋咀洲，問蜑家人個海灘叫咩名，蜑家人英文不靈光，口窒窒，最後咁答：「Beach，HaMun（廈門灣）！」糊塗英軍以為係「BeachHalfMoon（半月灣）」，從此以後，廈門灣就被人稱為半月灣。
根據環保署2002年泳灘水質報告，半月灣水質等級屬於良好，遠望海水一片綠，勁有青青珊瑚島Feel，有泳客話試過潛到2米深，已經可以望清海底，可想而知海水有幾清。半月灣海底屬沙底，東有滘西洲，東南面又有吊鐘洲，兩洲成屏障遮擋勁風，故灣內風平浪靜，適合潛水初哥玩潛水。
橋咀洲西面嘅橋咀灣，水質等級同半月灣同屬於良好，但水清沙不幼，沙灘滿布碎石同貝殼，赤腳玩沙灘漫步？免嘞！睇連島沙堤實際啲，一落船，望向右面，理論上你一定見到沙堤。上番堂地理課先，沙堤之所以形成，全因波浪將泥沙沖上岸，波浪微弱，夠力將沙泥沖上岸但又唔夠力帶返落海，慢慢變成沉積物，將附近2個島連成一線，所以叫連島沙堤。沙堤對岸叫「橋頭」，係釣魚熱點，「橋頭」盡頭有導航燈塔，每逢假日吸引唔少釣魚發燒友，石狗公、沙鑽同火點三五七斤走唔甩。
天氣勁凍，落水即變雪條，一班人柴娃娃去半月灣，重有乜好玩？BBQ是也！天氣咁涼，三五知己圍住火爐燒烤都幾過癮，一來唔使下下去淺水灣、赤柱咁悶，二來交通方便，西貢碼頭搭街渡15分鐘即到，去到又唔使同人爭爐。除咗燒烤，呢度重設有營地，如果你唔怕凍，玩埋露營都重得，不過要有心理準備，估計橋咀洲氣溫唔夠10嵖，絕對風涼兼水冷。
遊畢橋咀島，我哋返去西貢碼頭，順道參觀最近翻新重開、原本已有十幾年歷史嘅惠民路海濱公園。公園內最搶眼係中間嗰個水池，無音樂噴泉，又無激光表演，有嘅，只係幾隻由玻璃纖維製成嘅巨型報紙船，隻紙船「摺」成咁，唔知出自邊份報紙，但上面嘅「新聞」肯定關於60年代西貢區發展史，池旁有塊踏板上船，呼應埋西貢獨特嘅街渡文化。
呢個公園特別之處係多配套設施，情侶可以喺園內唯一嘅餐廳浪漫小敍，邊望無敵海景邊嘗美食。食完可以逛埋附設嘅迷你商場，買至潮衣服飾物；老人家可以約埋老朋友，去聲稱全港最大嘅棋盤下棋；最後，當然唔少得啱晒細路仔嘅遊樂場喇。一句到尾，呢個公園真係全家都啱玩。
玩咗成日，Jessica肚仔餓到咕咕聲，小記推介到松記車仔麵醫肚，店舖極之衞生，乾淨到連續5年攞食肆衞生獎，食物質素一流，不同麵底（$8）配超過15款配餸（$3至$5），揀都揀到眼花。
松記粉麵（27929172）
地址：西貢福民街高勝樓19至21號
