舊年嘅一粒沙士病毒，搞到成個香港翻天覆地，醫護人員就更加人心惶惶。好彩，香港人都幾有同情心，不斷有人捐錢捐物資畀醫管局，啲前線醫護先可以撐得住。所以醫管局趁噚日新春團拜，向所有曾經捐助嘅熱心人士致謝，包括出錢出力嘅行政長官夫人董趙洪娉、可口可樂同埋生產口罩嘅3M公司等等……
最緊要多謝嘅梗係唔少得前線醫護人員啦，所以醫管局特別整咗大批「同心結幸運星」紀念章，派畀五萬個員工，每人重有三百蚊禮物券，可以喺百佳同裕華國貨當現金咁使，報答佢哋沙士期間喺戰場上出生入死。
八方喺噚日呢個新春團拜，撞到上年唔小心感染到沙士嘅醫管局新界東醫院聯網總監馮康（圖）。佢睇嚟精神唔錯，佢原來前日先跑完渣打馬拉松，跑咗五個鐘跑晒全程，佢重篤爆有啲冇染沙士嘅醫生墊佢底㖭。
馮康話佢之前幾年都有參加過馬拉松，最快嗰年只係跑咗四個鐘頭二十分鐘，今年狀態就差啲啦！但佢強調自己冇患上沙士後遺症骨枯病噃。唉，只有民建聯先至患咗骨枯症啫，馮醫生唔使驚喎。
傳真︰2623-9278
電郵︰