自由黨自從七七事件、阻住23條恢復二讀之後，主席田北俊變成周星馳版嘅騎呢「人民英雄」，冇幾耐，佢就回復商人嘅現實正常本性，都好難怪佢，叫商家佬同中方鬥氣，即係同自己個荷包為敵。
為咗擴大影響力，自由黨喺過去一段時間，都不停向各方友好招手，拉人入黨，喺短短幾個月，黨員人數增加咗唔少。人多咗，個會址就覺得比較狹窄，呢個當然唔符合富貴黨嘅形象，自由黨嘅高層都認為有需要擴大地盤，四處搵樓，如無意外，夏季就搬得成。自由黨𠵱家個大本營喺上流人士出沒嘅中環都爹利街，要搬都只會搬到附近。
八方忽然醒起，理大嘅史Sir史文鴻已經上咗班做自由黨嘅總幹事，於是問佢份新工習慣未？史Sir話自己嚟「學嘢」。佢重笑住話，自己在學院其實重有得做，但生性鍾意做敢死隊，咪出象牙塔外撞一撞。言下之意，理大潘校長對佢「好行夾唔送」嘅江湖傳聞唔係真嘅，咁講。
傳真︰2623-9278
電郵︰