前晚曼聯贏愛華頓都算戲劇性，但係雲尼斯達羅頂入四比三奠勝後，有曼聯球員向主隊球迷做挑釁性手勢，其中一個嫌疑犯竟然係「大哥大」隊長堅尼。
愛華頓球迷賽後向球會投訴，指堅尼、加利尼維利同新仔基斯坦奴慶祝時做挑釁手勢，𠵱家警方都介入調查今次事件，相信英足總亦會追查前因後果。紅魔戲劇性贏波，球迷興奮之外，球員都好難控制情緒，但係我求大俠當知道堅尼都涉及在內，真係唔多明解，話晒堅尼身經百戰，可謂乜嘢場面都遇過，唔通過往嘅臭馬本色又復發？重要拖埋基斯坦奴落水，呢位隊長都算教壞後輩！
熱刺新兵迪科加盟即有士哥，呢位前韋斯咸球員，射破佢前隊友｜｜老樸門將希斯納十指關，重有領隊哈利列納都係佢恩師。不過，哈利列納賽後話熱刺買迪科有眼光，重話勁過朗尼同奧雲，我求大俠就覺得佢賣花讚花香，話晒迪科佢有份教出嚟，即係讚自己啦！
前克羅地亞球星波班，最近就喺薩格勒布大學讀完歷史學位課程，政府重邀請佢出任副教育部長，負責體育事務工作，認真巴閉。記得另一九八世界盃季軍隊成員蘇加，高掛球靴後，亦開辦足球學校訓練年輕人。我求大俠覺得𠵱家足球員唔再係波牛，有無修養就睇球員自己嘞！
碧咸紅透歐亞，但對於非足球狂熱嘅美國，呢位靚仔球星魅力同影響力唔大，好難打入荷李活。不過，最近情況有變，一幅高達一百四十五米超級巨型宣傳海報，高掛喺美國一幢酒店外牆，喺好遠地方都睇到「萬人迷」個樣，即刻多好多美國人識佢，終於開拓到美國市場。
曼聯對愛華頓場波，據報道英國博彩公司就差啲發大財，曼聯半場領先三球後，唔少波友都諗住贏梗，即時投注買紅魔贏波有成十六萬鎊，賠率就熱到一點○一倍；如果唔係雲佬個入球，博彩公司執到笑。我求大俠提醒波友，波係圓，冇話贏梗，尤其係英國波以大博小，唔化算㗎！