九七年金融風暴同八萬五，搞到通街負資產，𠵱家樓市有番起色，部份負資產業主可以鬆綁脫困，個別重勇到趁勢炒番兩轉，且有所斬獲，當係幫補吓又好報仇又好。
中原分區經理盧民偉講，呢名主角喺九七年高峯期用近一千萬，買咗個西半山殷榮閣逾千二呎單位，結果樓價一路下沉，守到舊年趁轉角市「壯士斷臂」，貼錢賣樓，蝕咗四百幾萬。
呢位仁兄雖然喺樓市上曾受重創，但並未因此退縮唔敢投資，喺舊年十月，將剩番嘅六十幾萬，買咗個值二百零一萬嘅西半山恒龍閣低層A室，八百八十呎銀主盤，一個月後以二百五十五萬沽出，賺五十四萬。之後又用一百二十五萬買入同區活倫閣低層A室，上月以一百四十八萬沽出，成功賺咗二十三萬。
聽講個客計劃再炒多幾轉，賺夠錢就一次過用三百萬，喺同區買番個單位自住，唔使怕再變成負資產嘞。
樓市自去年沙士疫潮之後急速反彈，吸引大批投資者入市，唔少重係海外買家㖭。世紀21按揭部高級經理蔡漢陞話，海外投資者嘅比例達八個巴仙，原因與銀行簡化對佢哋嘅批核手續有關。
𠵱家銀行只要求海外買家提供海外入息證明、資產證明同稅單就得嘞。不過，批核時間要十四至二十個工作天，仍比本港買家嘅七至十四天長。
蔡漢陞講，以一名台灣客剛購入的長沙灣宇晴軒為例，售價二百三十三萬，若採用發展商嘅兩成半二按，同埋銀行嘅七成按揭，實際只要攞樓價五個巴仙，即十一萬多，就可以擁有該單位嘞，出租回報有四厘六，點都好過擺喺銀行。
況且，銀行嘅樓按息率，普遍係兩厘幾，若用同業拆息計就更低至一厘一㖭，啲海外投資者又點會唔嚟香港大手掃貨呢？
美聯物業集團主席黃建業喺七三年公司成立時，促成嘅第一宗成交，梗係印象深刻啦！估唔到事隔三十一年，重可以同呢名買家重遇。
據黃建業講，呢位買家何太，當年透過佢買入荔枝角美孚新邨單位，後嚟移民美國。佢舊年去美加旅行時，都聯絡過何太，上個月何太返港度歲時，大家又相約食飯敍舊。
何太一直都有留意美聯嘅動向，對當年的年輕小伙子，今天成為上市公司主席，甚感欣慰。佢對本地物業投資好有興趣，今次順理成章重再度成為美記客戶㖭。
樓價短時間內升到你唔信，聽業內人士分析，原因係二手業主與發展商，夠膽大幅加價，估唔到啲買家又肯跟，所以就不斷屢創新高嘞。
當市場有一個新高價成咗之後，其他單位嘅價錢，梗係跟住「水漲船高」啦！呢啲就叫羊群效應。
另外，有啲二手業主見買家願承卻反價，結果益咗發展商。因為發展商手上貨多，只要啱價就散，好少反價。唔似得二手業主，可能都係揸住一兩個單位，突然間有客高價承接，搞到個心十五十六，怕賣平咗蝕底。
𠵱家商場愈嚟愈多，競爭自然激烈。蘭西聽啲商場大業主講，不時都要搞活動吸引消費者，但有時都會遇到一啲意想唔到嘅反應。例如俾住戶及業主立案法團投訴，指露天活動嘈住佢哋。有啲攞唔到遊戲票嘅消費者，就話佢哋唔公道，聽講有啲重報警㖭。所以要搞旺個場，都唔係咁易㗎。
蘭西
電郵地址：
