自稱「青樓名妓」的電盈副主席張永霖，噚日出席港台節目講投資心得；八方收到消息，呢位橫跨香港電訊同電盈兩個時代的奇才終於「從良」，二月底正式離職，餞別宴亦已食咗好多餐，故本周五將回請全部電盈同事，喺電盈嘅荔枝角ClubHouse食「蒲飛」，只要有興趣嘅同事，就可以報名，據聞反應不俗。
講起張永霖，唔知係咪好人緣得滯，一舉一動都成為業界內外的話題──最近有傳言話佢即將好似陳馮富珍咁光榮打入荷李活，即將出任加航總裁咁話。重有回復單身之後的「感情生活」；有消息話，張氏上禮拜在某一餐Farewell飯局內，係咁意同人講話「唔使返工就會同『老婆』環遊世界」，隨即引起哄動，研究張老哥係咪有興趣再做老襯呢？
可靠消息人士則同八方講，做加航總裁？冇咁嘅事。不過佢同前妻嘅感情就更勝從前，一齊環遊世界嘅極可能係前任張太；最關鍵係，據聞仰慕佢嘅婦女唔只一個，咁佢同得邊個結婚？咁多版本，回請宴時有冇人會追問吓名妓幾時埋街呢？
（圖）張永霖雖然離咗婚，但同前妻嘅感情重好過以前。 資料圖片
傳真︰2623-9278
電郵︰