美國爵士女歌手NorahJones嘅處女碟《ComeWithMe》全球叫好叫座，賣出超過一千六百萬張，足足可以鋪滿三十個大球場。去年囊括格林美八個大獎嘅Norah，擇好今日格林美舉行推出新碟《FeelsLikeHome》，本地推出嘅限量版因為加送咕𠱸套，所以唔少唱片舖都爭相入貨，搞到唔夠分。
Norah張新碟被視為今年全球必然勁賣嘅大碟，唔止美國，連日本、英國、法國同德國嘅購物網站嘅唱片訂購榜嘅冠軍都俾佢攞埋，走勢都幾凌厲。
Norah喺新歌《Sunrise》嘅ＭＶ入面，好意外咁畀大家睇吓佢活潑同搞笑嘅一面。個ＭＶ講Norah入咗一個好似《天線得得Ｂ》住嘅TeletubbiesLand咁嘅地方，嗰度唔止有花花草草，亦出現個太陽臉小朋友。
Norah個同居band友男友Lee，亦喺ＭＶ入面幫佢伴奏。Norah好鬼馬咁同女和音唱吓歌釣吓魚，見到池中出現佢哋分飾嘅花花仙子喺水中跳舞之後，又忽然跳蛇舞，笑到我羅拉肚痛，不過Lee就要繼續伴奏忍住笑，辛苦晒。