喺娛樂圈有唔少藝人都有對白鴿眼，就算佢唔係大紅大紫，都一樣咁心高氣傲，好似公仔箱嗰位排骨女藝員咁，佢啱啱出道做藝員嘅時候，對任何人都好客氣好禮貌，但後來做咗歌星，唱過幾首hit歌之後，排骨女藝員嗰副不可一世嘅真面目就完完全全暴露晒出嚟。
雖然排骨女藝員唱咗幾年之後因為唱片唔賣得而冇唱片公司肯同佢簽約，最後佢惟有食回頭草返番去公仔箱做藝員。不過排骨女星認為自己始終做過紅歌星，對以前風光日子始終念念不忘，所以喺同事面前佢都繼續擺阿姐款。
馮仁昭聽講最近有位圈中人諗住介紹排骨女星登台搵外快，點知排骨女星當正自己係一線阿姐咁，傾都唔傾多句就叫對方同自己助手度期，激到嗰位仁兄死死吓，佢話好似排骨女星咁嘅級數嘅歌手真係多的是，自己諗住益吓舊朋友，點知俾人寸到一面屁，真係好心冇好報！
台灣女子組合S.H.E噚日出席大型公開表演，佢哋重喺表演附近嘅花園，同美麗嘅花海合照，Selena話最喜歡粉紅玫瑰，Hebe就喜歡海芋，Ella則鍾情熱情嘅紅玫瑰。情人節在即，S.H.E苦笑因為冇情人，所以只能用心做好工作。
梅艷芳在生時為行善而成立咗慈善基金會，喺九三年時，阿梅曾經喺多倫多為頤康基金會做過一場籌款演唱會，籌到唔少錢。最近頤康中心為紀念阿梅生前樂善好施德行，計劃為呢位一代巨星樹碑立匾。而頤康中心主席王裕佳話，構思係想喺中心內其中一個大堂或會議廳以梅艷芳命名，至於會唔會安放肖像雕塑，就要再傾傾。
陶喆前晚走去欣賞鄧麗君傳奇音樂劇《但願人長久》，雖然套劇做成三個鐘頭，但陶喆由頭坐到尾，認真捧場。原來陶喆一直好欣賞鄧麗君，以前佢曾經將鄧麗君嘅《月亮代表我的心》改編成《月亮代表誰的心》嚟唱，陶喆話演員唱得似唔似鄧麗君唔重要，最緊要係導演手法好新，佢自己好鍾意喎！
陳祖明同Twins、陳栢霖喺雲南拍《千機變II之花都大戰》，噚日清晨佢哋搬離下榻酒店，去羅平縣嘅多依河拍戲，陳祖明雖然已經加入娛樂圈，但佢似乎重未做好心理準備，一直都迴避鏡頭，重要助手擋記者影相，佢噚日又着住件黑中褸，戴住褸帽同口罩唔敢見人，一副十分神秘嘅樣子。
黃夏蕙噚日喺酒樓同曹達華等飲茶，後來重拉隊去深圳幫麻雙鳴雕刻家嘅新店剪綵㖭。之前黃夏蕙發通告畀傳媒話會講佢同個雕刻家嘅一段情，點知噚日佢話：「佢好有善心成日幫人，我見佢咁好又想幫佢，我又咁有善心，呢個就係我哋嘅一段情。」搞到全場噓聲四起。咁我馮仁昭咁有型，唔通又同梁朝偉有一段情咩？
