昨日所講之泰國素可泰求籤一事，並非老作，因為去素可泰係泰國旅遊局安排嘅，團員全部係記者（左丁山除外），來自上海之女團友亦係記者，當時大家求籤唔知求得幾高興。
到美麗華酒店飲春茗，坐在二號枱，隔籬三號枱有位風水高手S老兄，S老兄嗌一聲：二係病符、三係是非、五係五黃，同枱一對老伴立即覺得唔安樂，因為老人家唔想有病也，佢哋卒之走過去三號枱，寧染是非，莫沾病符。
難得遇上高手，自然要請教：劉皇發求得之籤如何解讀？S老兄話：「報紙所報道嘅師傅解籤，盡皆報喜不報憂。擦鞋之言，千祈唔好信，支籤梗係唔掂啦。」既然如此，大家還是謹慎為宜，咪好似九七咁，搏命炒樓炒股。
一位讀者何太來電郵問華盛頓大學（密蘇里州）。如果你位千金入到去，恭喜晒，佢既然參加交流計劃，去密蘇里州讀中學第十二班，呢間聖路易市嘅華盛頓大學係州內最佳大學，全美國排第十名，但因屬私立，學費唔會平，如果你位千金攞唔到獎助學金，以你講嘅每年學費預算，恐怕負擔甚為吃力。波士頓嘅著名大學（哈佛、麻省理工等等）多數係私立，學費生活費都貴過密蘇里州。照計，讀UniversityofMissouri（密蘇里大學）都唔錯嘅，該校新聞系聞名全世界，響噹噹。你嘅學費預算，最啱係美國中西部、中南部（密蘇里州所在區域）讀州立大學，可應付裕如，讀私校就稍為手緊咯。