上周五港股忽然大反彈，當晚美國就業數據冇預期咁勁，有人話唔怕提早加息，當好嘢嚟炒，結果美股貼近全日高位收，杜指升近百點，納指升逾2%。港股偷步先升，唔通真係有春江鴨？
東亞（023）每年都為業績公布期拉起序幕，今年亦唔例外，明日就會交出03年全年成績表。一般估計，由於經濟好轉、地產復甦、負資產減少，銀行應有唔少撇數可以撥回，所以銀行股業績多數靚靚。
既然咁多人咁估，東亞盤數開出嚟之前，股價可能有得升，相關Call輪可以短炒。東亞有兩件Call輪買賣，9245現價35仙，溢價11.3%，槓桿率7倍，玩到9月中；另1件9278現價36仙，溢價12.2%，槓桿率6.8倍，玩到8月尾。兩件數據都唔係太吸引，9245稍稍好啲，而且交投較活，就揀佢。
地產股同銀行股一樣，係大市近日支柱。二線地產股中，恒隆地產（101）表現不俗，上周五升3%，突破短期降軌，收11.75元，距離近期高位13.05元，重有水位。恒隆地產得1件Call輪9318，現價1.93元，玩到11月尾，溢價5.8%，槓桿率6.1倍，數據可接受，不妨小注怡情。
章 盛