今屆渣打馬拉松係八年來最凍一屆，雖然清晨氣溫只有攝氏八度左右，加上寒風冷雨，但仍有超過二萬跑手參加，香港人咁有體育精神，絕對值得驕傲。
咁有代表性的體壇盛事，又點可以少得筋肉人嘅參與。同往年一樣，筋肉人參加十公里賽公開組別，時鐘踏正六時三刻，眾人勁「噓」董建華一聲（董特首為起步嘉賓），便開始由尖沙嘴彌敦道出發。
可能天冷關係，跑步時嘅感覺比上年好，記得往年跑至西隧出口，已開始有跑手暈到，但噚日最多出現只係跑手因熱身不足而出現抽筋嘅情況。
跑步一向唔係筋肉人嘅專長，更加唔講得有乜嘢成績，全程跑吓行吓、行吓跑吓，大約用咗一個鐘頭二十分鐘先返到終點（男子公開組冠軍時間為三十三分鐘）。
十公里元老及青年組，起步時間雖然比公開組遲半個小時，但前列選手跑至中環夏愨道，已經逐一越過筋肉人。呢班老人家重一邊跑一邊叫人讓路，咁好中氣，相比起嗰時連行路都冇力嘅筋肉人，真係有啲自愧不如。
文：筋肉人