自從胡紅玉老公「法蘭克．清」（中文名秦家驄）做足功課，提出中國外交部一九九四年二月十八日發表嘅聲明，白紙黑字承認二○○八年普選立法會係香港內政，由港方自行決定，中方當堂倒瀉籮蟹，指使四名護法嘅另一名老人邵天任出台，公然反口唔認，話當年中方咁講，唔等同話香港立法會普選，不必中方批准。
胡紅玉老公提供嘅檔案，摑咗中國一巴。當年嘅聲明，係外交承諾，亦即以國家政府地位向英國保證，二○○八年立法會普選，中方唔會干預。𠵱家又打橫嚟，公開反口，咁算點？呢份文件，英方係接收嘅一方，國與國之間對話，唔通又係人大常委會至有「解釋權」？係時候由貝理雅出面，打個電話問吓胡溫，究竟係乜意思嘞。
呢啲唔關乎愛唔愛國，而係守唔守國際信諾。邵天任狡辯稱：「決定香港的政制是中國行使主權的行為，不存在向誰做出保證，何況屆時香港的實際情況仍是未知之數。」
廢話！中國收回香港主權之前，大前提就係早向國際保證：港人治港、高度自治，中英聯合聲明喺聯合國註冊，就係向全球包括香港前宗主國英國作出嘅保證，決定香港行乜嘢政制，由中英聯合聲明保障。胡紅玉老公所發掘嘅中國外交部聲明，二○○八年香港立法會普選，由香港自己決定，就係中國政府嘅承諾。若果以「屆時香港實際情況仍是未知之數」嚟撒賴，咁香港喺九七後直至二○四六年，每年每月每日，都係未知之數，中國又何須保證香港行資本主義制度？
堂堂大國，有言在先，公然反口，好彩香港人尚未完全遭到洗腦。不過，民建聯核心人物楊耀忠，就話董政府嘅最大「失誤」，係冇加強「愛國教育」。
楊耀忠想廢董點加強「愛國教育」法？不如叫培僑、香島、漢華、勞校，接管晒全港嘅中小學好未？不如叫廢董下令梵蒂岡控制嘅天主教會及基督教外國勢力轄下嘅所有精英中學，如男女拔萃、喇沙、瑪利諾、聖保羅，全部關門滾出香港，全港剩番「培香漢勞」四大左校集團接管。
由楊耀忠做「愛國教育」集團行政總裁，鄔維庸做營運總監（負責收埋學費），曾鈺成做教學總監，曾憲梓做校董會主席：全體維園阿伯做校工，好唔好？
可惜畀個天廢董做膽，廢董就係唔敢！「愛國教育」？真係笑話。楊耀忠做老闆嘅嗰間香島，有幾多家長肯送子女去讀？點解英國寄宿學校教育節，年年迫爆玻璃門，個個家長都想自己個仔女早啲走？
何況廢董講「愛國」，不過係得把口！嗱，𠵱家美國政府就公然羞辱廢董嘅特區，下令港人去美國旅遊，領簽證，要打手指模喎。死嘞，本港好多土共啲老婆仔女都喺晒美國喎，打手指模，係侮辱民族人格嘅行為，呢，日本嘅韓僑，就曾經抗議過領身份證要打指模嘞。咁廢董又敢唔敢還以顏色，捍衞吓民族尊嚴，勒令美國遊客商人嚟香港，要喺特區政府駐華盛頓辦事處打番指模攞簽證吖？八方在此，就公然大廢董，話佢絕對唔敢。咁不如楊耀忠拉埋曾鈺成哋，走去花園道美國領事館扯橫額抗議吖，老襯！
傳真︰2623-9278
電郵︰