有創意可以助你簡單地解決複雜的問題；有創意亦可以助政府複雜地解決簡單的問題。
有創意可以令人由冇變成有；有創意亦可以令香港由有變成冇。
有創意可以令人甘心畀錢買票到戲院睇大笑姑婆的搞笑「蝦碌」片段；有創意亦可以令人甘心畀錢買報紙睇巨星匯的搞笑「蝦碌」報道。
有創意可以令香港變成中藥港、設計港及物流港；有創意亦可以令香港變成「得個講」。
有創意可以寫一份有創意的施政報告；有創意亦可以令議員要對一份冇乜創意的施政報告致謝。
有創意可以話母語教學好到只應天上有；有創意亦可以話母語教學只應天上有。
有創意可以令香港出現陰陽怪氣的「左口四人幫」；有創意亦可以在香港成立慳番啖氣的「政改三人組」。
有創意可以將歌曲《家變》變成《雞變》；有創意亦可以令香港雞變繼而令人家變。
有創意可以在煲飯時多放一雙鮮紅色的膶腸加「餸」；有創意亦可以令這雙鮮紅色的膶腸變成城中最時尚標誌。
有創意可以撰寫一本簡單易明的基本法；有創意亦可以令這本原來簡單易明的基本法變成得佢睇得明。
所以話，創意是多麼的重要！