英國殿堂級男歌手史汀（Sting）近排猛咁攞獎，上年十月佢獲英女皇頒發CBE勳銜，十二月又獲Billboard音樂頒獎禮世紀大獎，前晚佢又去到喺洛杉磯舉行嘅Musicares年度晚宴，獲封為○四年嘅風雲人物，相當威水。
上月喺北美展開巡迴演唱會嘅史汀，當晚同老婆TrudieStyler以及個女Coco一齊出席晚宴，身為主角嘅佢特別高興，表演嗰陣亦份外投入同落力，事關呢晚嘅收益係為Musicares呢個計劃籌款，善款會用嚟幫助一啲經濟上有困難或者要醫病嘅音樂人，所以個個歌手都好賣力演唱。
除咗史汀，艾頓莊（EltonJohn）同BobGeldof等重量級人馬都齊齊登場，而澳洲女歌手KylieMinogue當然唔會放過呢個曝光嘅機會，皆因早排有報道話佢極欲攻陷美國市場，所以睇怕以後嗰邊有乜大小宴會都唔會少得佢嗰份。另外，至鍾意出風頭嘅《花花公子》老細曉夏夫拿（HughHefner），依然見佢不厭其煩咁拖晒成班玩伴出嚟撐場。
講番史汀，喺嚟緊嘅格林美獎獲最佳流行男歌手等兩項提名，奧斯卡又憑為《亂世情天》寫嘅歌提名最佳電影歌曲，睇嚟佢攞獎個勢重未停噃。